الجزء الأول من إعادة احياء للريسيفر المميز ترومان بريمير 1+ (مقالة شاملة)

الريسيفر ده المفروض سعره غالي وكلنا عارفين ان سعره وصل لـ 1000 جنية
بس السؤال هنا .. هل هو فعلاً يستحق المبلغ ده؟؟
مبدئياً خلينا نتكلم ندردش شوية عن الريسيفر ويقدر يعمل ايه وايه المشاكل الموجودة ..
الريسيفر فيه مخرج USB واحد لكن فيه ميزة انه Host يعنى ينفع تشتري USB Hub ب 30 جنية وتقدر توصل أكتر من فلاشة في نفس الوقت ودي ميزة عاجباني بصراحة .. ماركة Truman معروفة من زمان .. الريسيفر مجهز أنه يشغل نوعين من السوفتوير (سبارك - انيجما) في نفس الوقت .. أصيل ويستحمل اللى انت بتعمله فيه :D .. الدعم الفني والسيرفر المجاني للاسف سيئين حالياً
انا عن نفسي شايف انه ريسيفر جبار لكن كان محتاج انه يلاقي اهتمام أكتر من كده ويكون سوفتوير السبارك أفضل شوية والهاردوير يكون أقوي شوية



الانيجما معتمد علي نظام تشغيل أسمه لينكس وده نظام تشغيل قوي معظم المبرمجين بيستخدموه بدل ويندوز او جنبه
وهو مش سهل للناس الجديدة انما لما تعرف كل حاجة عنه وتتعود عليه هتلاقي الدنيا تمام
في شوية فروقات حابب اوضحها بالنسبة للانيجما عشان متستغربش لو سمعت الحاجات دى:
صورة انيجما: دى معناها بسيط خالص وممكن نفهمها بمثال .. دلوقتى انت لما بتيجي تسطب ويندوز علي جهازك مش هو اسمه ويندوز؟ طب مش المفروض في نسخ منه مختلفة زي ويندوز 7 و ويندوز 8.1 و ويندوز 10؟ وكل واحدة فيها مميزات وفيها عيوب وفي ناس بترتاح لنسخة عن التانية؟ نفس الكلام هنا .. ف هنا اسمه "صورة" بمعني "نسخة" لأن في صور كتير للانيجما اشهرهم PKTeam / OpenPLi وفي غيرهم كتير وبرضو كل واحدة فيها مشاكل ومميزات واللى انت مرتاحلها كمل معاها :D
ايمو: فاكرين mgcamd و wicardd و camconfig .. هنا بقي اسمه Emu او ايمو .. ودى الحاجة المسئولة عن انك لما تحطلها سيرفر CCCam مثلا تقدر تشغللك قنوات الشيرينج المتشفرة
بلجن: ودى البرامج او الاضافات اللى انت مسطبها علي الصورة (النسخة) بتاعتك وأحب ابشركم ان انيجما مليان بلجنز وليها تحديثات شهرية ^_^
سكين: ده الحاجة اللى تقدر تغير بيها شكل القوائم وشكل الصورة عمتاً وفي سكينات كتير للانيجما وبتفرق من صورة لصورة
كراش: بمعني ان الريسيفر يجبلك شاشة خضراء او زرقاء زي الويندوز :O ويعمل ريستارت لوحده .. وده طبعا سببه يا اما بلجن بايظ او مش متوافق مع الصورة يا اما سكين بايظ او مش متوافق مع الصورة او علق بسبب ان الصورة تقيلة علي هاردوير الجهاز
صورة خام: بمعني ان الصورة دى مفيهاش أي بلجن ولا أي سكينات ولا أي اضافات عمتاً ولا اللغة العربية .. وانت بتسطب كل حاجة من الصفر
باك اب: شخص محترف جاب الصورة الخام وحط عليها البلجنز المهمة وقوائم قنوات جاهزة وسكينات حلوة ورفعها للناس جاهزة (بمجرد انهم يركبوها علي جهازهم وبس)
بيكون: صور اللوجوهات للقنوات اللي بتظهر اما بتنتقل من قناة لقناة
ملف قنوات او userbouquet او settings: ودي ملفات قنوات جاهزة بالاقمار والمفضلة






هل اقدر أحول ما بين السبارك والانيجما؟
اه اكيد
في السبارك تقدر توصللها من system وبعدين Basic settings وبعدين factory default وبعدين Boot to E2
في الانيجما في بلجن أسمه DuckBA هتلاقيه اخر حاجة اما تدوس زرار MENU وبعدين تختار Boot to spark
طب لو الريسيفر معلق وفي مشكلة فى الصورة او السبارك ..
1- هتقفل الريسيفر من الزرار اللي ورا وتستني 5 ثواني
2- افضل دايس علي زرار OK في الريسيفر (مش الريموت) ومتسيبش الزرار
3- افتح الريسيفر من الزرار اللى ورا
4- اول ما تلاقي كلمة FORC ظهرتلك سيب زرار الـ OK
5- لو عاوز ترجع للسبارك: دوس فوق مرة او مرتين (زرار CH+) وبعدين دوس OK
6- لو عاوز ترجع للانيجما: دوس تحت مرة (زرار CH-) وبعدين دوس OK

ايه هي مميزات الانيجما؟
1- له بلجنات كتير وليها تحديثات مستمرة
2- لو انت بتتفرج علي قنوات الشيرينج والفيلم مش مترجم ينفع انك تترجم الفيلم ترجمة عربي بتنزلها من بلجن الترجمة وتظبطها مع توقيت الفيلم!
4- لو انت مشترك في سيرفر IPTV فـ ملف الأيبي تي في ده تقدر توصله من قائمة القنوات العادية بتاعت الريسيفر :D
5- الـ EPG مكتوب بالفرنساوي؟ مفيش مشكلة في بلجن بتترجم الـ EPG لعربي او اي لغة انت عاوزها :D
6- اليوتيوب اللى متدمر فى السبارك .. هنا طبعا شغال وزي الفل وله أكتر من بلجن ^^
7- مفيش بطئ في بداية تشغيل الريسيفر تاني خلاص



اول خطوة هنحتاج:
1- فلاشة متفرمته علي FAT32 (شرح مبسط)
2- تتأكد انك مشتري جهاز ترومان بريمير 1+ مش ترومان توب بوكس .. وهنا صورة كل واحد منهم (بريمير 1+) (توب بوكس)
3- نظام السبارك يكون شغال
4- نظام السبارك متسطب عليه بلجن WLTool وبلجن e2upgrade (تحميل وشرح مبسط)
5- الباك اب الخاص بي: (تحميل) (باسورد فك الضغط truman1plus) أفضل صورة PKTeam معدلة ومضاف اليها تحديثات من بلجنز وملف قنوات ( الاصلية من موقع مصراوي سات بواسطة المبدع MUAATH)

تاني خطوة:
بعد فرمته الفلاشة الي FAT32 .. فك ضغط الباك اب في الفلاشة بحيث يكون فولدر enigma2 هو الوحيد الموجود فى الفلاشة وبداخله ملفين .. وتكون محتويات الفلاشة بالشكل ده:


تالت خطوة:
1- لازم نشيل اي حاجة ليها علاقة بالانيجما او اي صورة قديمة بايظة علي الجهاز بالطريقة دى ..
ادخل علي بلجن WLTool في السبارك وتابع الصور







2- نفلش الباك اب اللى نزلناه:
خش علي بلجن e2upgrade وتابع الصور